30/05/08

Libros con pegada


Ao igual que fixeron outros centros educativos galegos seguindo a idea dun centro asturiano narrada por Gonzalo Moure, a biblioteca "O bosque animado" en colaboración co Equipo de Normalización Lingüística, na semana previa ao día das Letras Galegas animou ao alumnado do IES para que anotara nunha plantilla dun pé algúns dos seus libros favoritos lidos en lingua galega. Cos máis de catrocentos pés enchéronse os corredores dos instituto indicando á dirección da biblioteca. Libros con pegada.

Entre os libros seleccionados polo alumnado destacou especialmente “Contos para Manuela” de Mario Pereira.

26/05/08

Roteiro polas Bibliotecas Escolares (V): O IES Alexandre Bóveda



Acta, informal, do acontecido a mediados de maio en Vigo e arredores:


O comité de recepción (Beni) na porta principal. O señor director no recibidor. O xefe de estudos pendente da nosa chegada. Que ben saben facer as cousas no IES Alexandre Bóveda de Vigo. Como se esmeran cando son visitados-inspeccionados polo inspectores de bibliotecas escolares.


Os GBI (A nosa biblioteca, Biblioafonso e O Segrel do Penedo) tivemos insistentes chamadas para visitar a biblioteca deste centro de Vigo. Mesmo tivemos que pospoñer outra visita xa concertada con anterioridade. Que nos quería amosar Beni? Cal era a razón da súa insistencia?
No recibidor do centro xurde, desde o século XIX, Xulio Verne. O globo dalgunha das súas famosas novelas sobrevou as nosas cabezas. Todo o que se pode expoñer sobre o autor francés, incluso a noticia da súa presenza en Vigo, está amosado na completísima exposición que enche de vida os corredores do Alexandre Bóveda. Traballo de moitos meses reflectido nas paredes.
Pero, onde estaba a biblioteca?


Por fin, tras múltiples explicacións sobre a colaboracións dos departamentos (magnífico polbo realizado por Cristina de plástica) e os contidos da exposición, conseguimos entrar na biblio. Mais, que é unha biblioteca? un almacén de libros ordenados, tan só iso? Sofás, ordenadores, televisor, canón de vídeo, dvds, revistas e libros, moitos libros nun espazo atractivo e agradábel. Polo tanto, se xulgáramos a calidade dunha biblioteca pola utilización que dela fan os seus principais destinatarios (o alumnado) o IES Alexandre Bóveda, conta cunha extraordinaria biblioteca. Biblioteca que non só ten un curruncho para Xulio Verne senón que tamén ten un zombi, si, si, un auténtico zombi para animar á lectura e á busca de información. Ai se o seu traxe falara!!!

Tras a inspección, degustamos?, devoramos? un suculento guiso de peixeno restaurante Camineira en Aldán acompañados por todo o grupo da Biblio. Foi unha comida ben agradábel na que rimos e falamos de libros, dinamización, Bibliotecas Escolares, reivindicacións...

E despois da comida que? Unha viaxe na que quedamos abraiados coa beleza desta ría e impactados coa fermosura do conxunto arquitectónico de santo André de Hío. Difícil será superar a calidade da acollida recibida polos GBI. Quen se atreverá a organizarnos a seguinte inspección deste grupo despois da visita a Vigo-Aldán?

Grazas Super Beni, Sara, Cristina, Paco... a nosa primeira saída oficial fóra da provincia da Coruña tivo un resultado excelente.

Que se vaian preparando por Monforte!!!



Outros Roteiros

IES de Arzúa


CEIP Milladoiro-Malpica

CEIP José Cornide (A Coruña)

IES Uxio Novoneyra (A Coruña)

Tamén nos outros GBI Blogues

A Nosa Biblioteca

O Segrel do Penedo

20/05/08

Acto poético-musical co gallo do Día das Letras Galegas



A iniciativa dun grupo de alumnos e alumnas de 1º curso de Bacharelato e coa colaboración do Equipo de Normalización e Dinamización Lingüística, tivo lugar no Salón de Actos do IES. o venres 16 de Maio, víspera do Día das Letras Galegas un recital poético acompañado da escoita de algunhas pezas musicáis.

Os alumnos e alumnas recitaron textos de Castelao, Celso Emilio Ferreiro, Manuel María, Miguel Hernández e Xosé Mª Álvarez Blázquez, a quen este ano se dedica o Día das Letras.

Así mesmo, poidemos escoitar poemas de diversos autores (Rosalía, Curros, Cunqueiro, ......) musicados por outros tantos cantantes e grupos (Deus Ke Te Creu, Fuxan os Ventos, Luís Emilio Batallán, Amancio Prada e Lamatumbá )

O acto contou coa asistencia de numeroso público, que encheu o Salón de Actos e aplaudíu longamente as intervencións.

Queremos, por último, manifestar o noso agradecemento e aplauso a todos os alumnos e alumnas participantes a darlles o noso ánimo e apoio para repetir a experiencia en vindeiras ocasións.

19/05/08

Exposición: Castelao. Debuxos de negros


Na xornada anterior á celebración do día das Letras Galegas, a biblioteca "O bosque animado" inaugurou a exposicón Castealo: debuxos de negros. Son unha ducia de láminas que veñen introducidas polo seguinte texto de Domingo García -Sabell:


Alfonso Daniel Rodríguez Castelao –sinxelamente, Castelao para nós os galegos- foi un grande artista creador, e un ilustre patriota, que nace una pequena vila mariñeira de Rianxo, nas Rías Baixas, en 1886.

A súa vida percorre en dous ritmos contrarios. Un, lento, tranquilo, de traballo cotián, no medio natural, Galicia, que comprende aproximadamente o lapso de tempo entre 1909 –primeiras exteriorizacións da súa arte de debuxante- e 1936. O segundo, moi axitado, inquedante, ateigado de loitas, esperanzas e morriñas, vai dede 1936 deica 1950, no cal ano, un 7 de xaneiro, finou una cidade de Bos Aires. O desacougo persoal de Castelao neses catorce derradeiros anos non impediu, máis ben facilitou, pola virtude da súa distendida carga espiritual, o florecer de novas caras da súa arte.

Os debuxos de negros, feitos en Cuba e en Norteamérica, en 1939, son sen dúbida unha das expresións máis verdadeiras, e máis patéticas, da creatividade do artísta
.” Domigo García-Sabell (1970)


16/05/08

Antonio Reigosa no instituto


O mércores, día 14 de maio, estivo dando unha conferencia o escritor Antonio Reigosa no salón de actos do centro.

Falou nun primeiro momento do concepto de literatura oral, facendo unha contraposición entre as historias da súa infancia e as actuais. Salientou tamén a necesidade do seu coñecemento como resposta ás inquedanzas que o home xera na súa aprendizaxe vital. A seguir, centrouse nas novas tecnoloxías e no seu papel difusor de lendas urbanas. Pediu a colaboración do alumnado para comentar algunhas delas, o que lle serviu para destacar as características do conto oral tradicional e para lembrarlles aos rapaces/zas a importancia de recoñecer o que nos rodea.

Por último, referiuse á lenda da hidria da igrexa románica de Cambre, un exemplo cercan a eles/as de lenda tradicional. Tamén mencionou a páxina web
www.galiciaencantanda.com onde encontrarían máis información e mesmo concursos relacionados con lugares emblemáticos da xeografía galega.
Nun ambiente distendido os rapaces/zas dialogaron co conferenciante, constituíndo a mellor testemuña de que unha manifestación literaria con miles de anos de antigüidade pervive na sociedade actual, aínda que con outro vestiario.

09/05/08

Cumprimos un ano!!!

Parece imposible. Biblioafonso xa ten ou o seu primeiro ano. Semella que foi aínda onte cando Antonio Alonso trataba de convencernos e explicarnos para que servían os blogs e como facelos. Grazas á xenerosidade de Loly Lago, varios docentes do IES Afonso X Sabio puidemos acudir a unha (logo sería catro) xornada de formación no IES de Fene. E desde entón ... sen parar.

Novidades, cambios no mobiliario, exposicións, guías de lectura, concursos, formación de usuarios e usuarias, educación documental, recomendacións de lectura, de películas, de música, de páxinas webs, música na biblioteca, actividades de formación para o equipo docente da biblioteca, compartir a nosa experiencia con outros centros que visitaron o noso, traballos colaborativos, clubs de lectura...

E todo co obxectivo de “enganchar” ao alumnado. Conseguímolo? Sabemos que a súa opinión, a dos que veñen pola biblioteca, é positiva. Pero estamos empezando. Hai moito traballo por facer tanto entre o profesorado, as familias e o alumnado.

E sempre xuntos neste camiño de aprendizaxe permanente, sempre compartindo e aprendendo cos outros blogs da bibliotecas escolares galegas e con outros blogs persoais e colectivos que tamén abordan o tema da lectura. O mellor deste camiño é o de facelo xuntos.

05/05/08

Abril, mes do libro (VIII): recomendacións de lectura de ciencia ficción

Tamén, e dentro das actividades relacionadas con "Abril, mes do libro", elaboramos unha guía co material bibliográfico sobre ciencia-ficción que temos na nosa biblioteca e, para orientar mellor aos lectores, agrupámolo en seis apartados:

Precursores: Aquí incluímos a Frankenstein, a primeira novela de monstros, froito da imaxinación romántica de Mary Shelley, e as novelas de viaxes fantásticas a mundos inexplorados ou lugares inaccesibles (Viaxe ao centro da Terra, 20.000 leguas de viaje submarino, Da Terra á Lúa, Viaje alrededor de la Luna de Verne, ou El mundo perdido, de Conan Doyle…)

CLÁSICOS: Dedicamos este espazo ás creacións de H. G. Wells, de cuxa prodixiosa mente xurdiron O home invisible, La isla del doctor Moureau, La guerra de los mundos e un dos exemplos máis xenuínos de novelas de viaxes intertemporales, La máquina del tiempo; e a Aldous Huxley, autor de Un mundo feliz, cuxos habitantes son procreados in vitro a imaxe e semellanza dunha cadea de montaxe...

IMPRESCINDIBLES: Tres libros que non podes perder se queres sacar o master en ciencia-ficción: Solaris de Stanislav Lem, Crónicas marcianas de Ray Bradbury (colección de 25 relatos curtos onde se describe como sería a futura colonización de Marte por parte dos seres humanos) e Fundación, primeiro título da serie das fundacións do xenial Asimov.

ROBOTS: apartado fundamental para os amantes da cibernética e a ciencia (Relatos del piloto Pirx de Lem, Amigos robots de Asimov…)

XUVENIL: lecturas lixeiras e amenas para que os máis novos iníciense no tema como Los piratas de la mente de Patricia Miles, Les detectives de l´espace de Danièle Bourdais, Señales de otro mundo de Mónica Hughes, dous títulos de Muñoz Puelles (2083 e o didáctico El viaje de la Evolución), Gauditronix e En un lugar llamado Tierra de Sierra i Fabra, El enigma N.I.D.O. de Fernando Lalana, La trilogía de los trípodes, Return to Earth, La bola de fuego, Tierra a la vista de John Christopher, adaptacións das cinematográficas Jurassic Park ou de Men in black… e mooooitos máis.

BANDA DESEÑADA: Apartado que non podía faltar e do que a nosa biblioteca ofrece interesantes títulos: para os incondicionais do xénero, El garaje hermético de Moebius e Watchmen, A. Moore; o clásico Hergé con Tintín. Obxectivo: a Lúa; e para os máis pequenos, Astro. Valente explorador de Javier Olivares.


03/05/08

Abril, mes do libro (VII): as mochilas viaxeiras



Tamén en abril, a biblioteca "O bosque animado" puxo en funcionamento "As mochilas viaxeiras" entre o alumnado de 2º da ESO.

Cada mochila contén un libro sobre a educación ou a adolescencia, destinado aos pais; dúas novelas, para a nai-pai e outra para o alumno/a; dúas revistas; un cedé de música e unha película en deuvedé.



Foi tal a demanda, cando expusemos o prexecto entre o alumnado que tivemos que ampliar o número de mochilas en funcionamento. Xa nos están chegando de volta as primeiras cuns comentarios positivos por parte das familias.