25 de Novembro: contra a violencia de xénero

Co gallo do día contra a violencia de xénero, dende a biblioteca fixemos unha proxección no vestíbulo do IES dun vídeo informativo contra a violencia de xénero a través dos recursos dixitais

Lugares para soñar

Ata o día 15 de novembro podedes visitar na biblioteca do noso centro a  exposición “Lugares para soñar”.

Está composta polos traballos sobre as formas de relevo, o clima e a vexetación, aspectos estudados na materia de Xeografía de 1º e 2º ESO.

Escarpados cantís onde bate o mar,  cumios xeados das grandes cordilleiras do planeta, extensións de fina area dourada, densas selvas das que xorden xigantescas pirámides feitas polo home, illas paradisíacas, xeos en paraxes silenciosos... Son, todas elas,  fermosas paisaxes que xa formarán parte dos vosos soños.

Novo club de lectura sobre obras de Primo Levi:

   Ola. O Departamento de filosofía, como outros anos atrás, abre este curso de 2019-20 o seu novo club de lectura composto por cinco persoas (dúas alumnas
e tres alumnos, todos de distintos grupos de primeiro de bacharelato).
   Leremos as dúas primeiras obras da famoso  Triloxía de Auschwitz, de Primo Levi.
   O xoves pasado tivemos xa a nosa primeira reunión para falar dos capítulos 1-5 de Se isto é un home/Si esto es un hombre.
   Queremos aproveitar para dar a coñecer o noso blog por se alguén desexa unirse algunha vez á nosa lectura vía internet. Moitas gracias:
   https://siestoesunhombrelatreguadefilax.blogspot.com/

Samaín 2019

Hoxe o medo chegou á biblioteca para rematar a celebración do Samaín coa entrega de premios dos dous concursos propostos na ESO.

Antes de desvelar as premiadas Xabier Docampo prestounos o seu EU TEÑO MEDO... para poñernos en situación. Despois fixemos entrega dos premios á PORTA MÁIS TERRORÍFICA, a clase afortunada foi 2ºA, parabéns!!!!! Esta elección vén dada polo medo que daba a porta, pola incorporación de elementos tradicionais como o urco e da fantástica posta en escena acorde coa porta. 

Como os traballos eran terrorificamente magníficos decidimos, por unanimidade, conceder un accésit a 2º B.

A continuación desvelouse o primeiro premio do concurso de RELATOS DE MEDO de 3º e 4º da ESO. A afortunada foi Lena Fachal Alonso de 4ºA. Parabéns!!!

Grazas pola vosa participación, polo entusiasmo e polo esforzo. Vémonos no próximo Samaín!!!!

Exposición: "50 anos do gran paso"

A Biblioteca en colaboración co Departamento de Xeografía e Historia organiza, durante o mes de novembro, a exposición “50 anos do gran paso” para conmemorar a chegada da humanidade á Lúa.

A Exposición iníciase cun gran “photocall” seguida dunha mostra de maquetas alusivas ao evento realizadas polo alumnado de 1º da ESO na materia de Lingua e Literatura Galega. Posteriormente pódense contemplar dez grandes paneis nos que se recolle información, tal como: os proxectos americanos Geminis, Apolo; a nova da chegada á Lúa na prensa mundial; as principais persoas protagonistas; a carreira espacial da URSS; a muller (e o machismo) na carreira espacial ou mesmo os filmes nos que o espazo é protagonista.

As visitas guiadas do alumnado van acompañadas dunha ficha de actividades.

Teleantiga de 1º ESO A

A través do tempo: Teleantiga de 1º ESO A

O alumnado de 1º ESO A presenta A través do tempo.

A morte do xove faraón Tutankamon, as crecidas do Nilo en Exipto, o primeiro código escrito de leis da historia, a batalla das Termópilas ou a erupción do Vesubio, son algunhas das novas da Antigüidade que estes reporteiros de 1º ESO A nos presentan neste Teleantiga.

Desde a materia de Xeografía e Historia vos invitamos a ver este telexornal coas novas da Antigüidade:

A reconstrución da historia: de Grecia a Roma

Nesta 3ª avaliación os alumnos de 1º da ESO quixemos FACER Historia!.

Nada de aburridas explicacións sobre a antigüidade clásica, decidimos TRABALLAR por proxectos.

Sendo o noso obxectivo estudar os contidos relativos á historia de Grecia e Roma, puxémonos a ler sobre as cuestións que máis nos interesaban do mundo clásico. Unha vez escollidos os temas comezamos a ELABORAR o noso traballo (ben de forma individual ou por parellas).

Un proxecto libre e creativo que consistiu, por un lado, en elixir calquera acontecemento da historia antiga (político, económico ou social) ou produción material (artística e/ou funcional) e RECONSTRUÍR eses fragmentos para darlle vida á Historia que esconden, como se fósemos verdadeiros/as historiadores ou arqueólogos. Así naceron as nosas maquetas e dioramas, cascos gregos e romanos, vasos cerámicos, xogos de mesa, noticiarios, reportaxes históricas e, incluso, improvisacións rapeiras.

Por outro lado, tivemos que documentar -en audio e vídeo- todo o proceso de elaboración dos nosos proxectos e explicar o como e o porqué do que estabamos a facer na aula e o significado e/ou funcións deses obxectos do pasado. E o mellor e que puidemos sacar o móbiles, gravar cos nosos ordenadores e APRENDER novos recursos!.

Por último, completamos as actividades facendo unha exposición na aula para EXPLICAR, aos nosos “expertos” compañeiros, os resultados máis salientables no nosos traballo. Finalmente, puidemos expor tamén algúns deles na biblioteca do centro.

Esperamos que vos gusten!

    Asinado: S.P.Q.R.

“Gustoume a idea de facer os traballos,

porque é unha maneira de aprender e atender ao contido máis entretida”

                                      

(Isabel Fernández, 1º ESO E)

“Eu creo que é mellor facer traballos porque nos gusta máis, e creo que si algo nos gusta o aprendemos mellor. Tamén me pareceu moi interesante, e ademais ao expoñelo aprendemos máis dos demais traballos”

(Yaiza Carballeira, 1º ESO C)

 “Facer o proxecto é mellor porque é máis divertido e... saca o lado creativo de cada persoa”

(Valeria Santiago, 1º ESO D)

Camiño dos Faros: proxecto final

Este curso quixemos coñecer máis da nosa terra e trouxemos o mar a Cambre, ao instituto. O motivo foi aproveitar a Costa da Morte e o marabilloso Camiño dos Faros para conseguir varios obxectivos.

O primeiro e fundamental coñecer Galicia e o que temos máis preto. Como pretexto tomamos o Camiño dos Faros pois axeitábase moi ben ao alumnado posto que son oito etapas e cadraban moi ben oito grupos de tres persoas por aula. 

A actividade consta de dúas partes: construír unha maqueta do faro da etapa correspondente e elaborar unha guía desa etapa. Nesta guía debían tratarse cinco puntos principalmente e maiores engadir o que considerasen; situación do punto de inicio e do punto da fin, lugares polos que transita a etapa, paisaxe, flora e fauna e que podemos ver ao longo da etapa. A isto engadímoslle posibilidades: lendas, curiosidades, literatura, gastronomía...

Outro dos obxectivos era valorar a terra que nos rodea e coñecer lugares fantásticos a menos dunha hora de camiño. Asemade coñecer os motivos que levan á denominación de Costa da Morte.

Como remate da proposta temos programada unha saída para facer un anaco do Camiño desde o Cemiterio dos Ingleses até cabo Vilán, tramo incluído na quinta etapa Arou-Camariñas.

Andrea Maceiras no seu IES

Volveu visitarnos Andrea Maceiras. Sempre é un pracer recibila na súa casa.

Nada na Coruña en 1987, é unha escritora e profesora de lingua e literatura galega. Estuda a Eso e o Bacharelato no IES Afonso X O Sabio de Cambre. Licenciada en Filoloxía hispánica e en Filoloxía galega, doutorada na Universidade da Coruña. É profesora de Lingua Galega e Literatura en educación secundaria. En 2018 gañou o Premio Lazarillo á creación literaria coa obra titulada Rusgalía, segundo o xurado: "unha obra ben xurdida e entramada cunha linguaxe poética con belísimas escenas que te transportan a un mundo galáctico. Unha aposta á imaxinación desbordante e á ciencia ficción”.

Ademais de compartir unha horas co alumnado seleccionamos do noso fondo as súas publicacións e fixemos unha pequena guía de lectura.