O bibliotecario heavy

Hai moitos tipos de bibliotecarios e de bibliotecarias, pero coñecíades o "bibliotecario heavy"?


Vía Trafegando ronseis.

Guía de recomendacións para o tempo de nadal

As bibliotecas municipais e escolares de Cambre estivemos traballando na elaboración dunha guía conxunta de suxestións para agasallos de Nadal. É este o terceiro traballo que realizamos en colaboración co concello e temos que dicir que a experiencia é sumamente enriquecedora. Estamos realmente moi orgullosos do resultado que vos presentamos e que repartimos en todos os centros de ensino do concello e que se distribúe tamén a través das bibliotecas municipais. Os centros que participamos no proxecto somos: Galescola, CEIP Portofaro, CEIP O Graxal, CEIP Torrente Ballester, CEIP Emilio González López, CEIP Wenceslao Fernández Flórez, IES David Buján e o IES Afonso X O Sabio.

Desde as bibliotecas municipais e escolares de Cambre desexámosvos Bo Nadal e propoñémosvos esta guía de propostas para agasallar nas próximas festas. Incluímos libros para todas as idades, banda deseñada, dvds, cds, todo un mundo para gozar e compartir. É un traballo colaborativo feito con ilusión por todos nós.

Xa sabedes: Un libro sempre, tamén no Nadal.
Bo Nadal e Aninovo

As linguas

Grazas ao blog amigo Trafegando ronseis, coñecimos este vídeo sobre as relacións entre a lingua galega e a portuguesa.

A nosa biblio na prensa

A edición en papel do xornal coruñés La Opinión

publica hoxe a noticia do premio recibido pola nosa biblioteca.

A nova tan só contén dous erros (menos mal que recibiron a

información por escrito...)

Unha de indios

-Ilustración a partir dun debuxo de Alejandro G. (4ºA)-

Canción dos indios chippewas

Desde a outra metade
do ceo
o que alí habita
ven facendo ruído.
Este ceo azul
cando lle falo
respóndeme.


-Ilustración a partir dun debuxo de Yago F. (4ºA)-


Canción dos indios navajos

¡A voz que embelece a terra!
A voz de arriba,
a voz do trono,

entre as nubes negras,
está soando e soando,
a voz que embelece a terra.

¡A voz que embelece a terra!
Avoz de abaixo,
a voz do saltón,
entre as flores e a herba,
está soando e soando,
a voz que embelece a terra.


-Ilustración de Lucas S. (4ºA)-


Oración sioux

Avó,
vou lanzar a miña voz,
¡escoitame!
Por todo o univereso
vou lanzar a miña voz,
¡escoitame,
avó!
¡Quero vivir!
Xa o dixen.

As tres están extraídas do libro Antología de poesía primitiva, editado por Ernesto Cardenal, en Alianza Editorial. Podes atopalo nesta biblioteca, na sección "Outras literaturas".

Atréveste con Leonardo da Vinci?

Non hai xeito mellor de coñecer a un personaxe que meténdose no seu pel, investigar da mesma forma que el, cos seus recursos.

Neste libro poderás atopar desde o seu libro de familia, planos das cidades onde vivíu, coñecer os seus deseños militares, as súas ideas para volar, para mellorar o transporte; os seus planes secretos, os novos instrumentos musicais que deseñou, o seu robot, as innovacións nas técnicas pictóricas ata o seu testamento.

Sabías que Leonado escribía de dereita a esquerda? Neste libro atopas algún espello para comprender os seus textos.

Todo Leonardo en: Susanne Rebscher. Leonardo da Vinci. Zaragoza, Edelvives, 2008.

10 de decembro: Día Internacional dos Dereitos Humanos

As amigas bibliotecarias do IES Río Cabe de Monforte, ofrécennos este cartel sobre O Día do Dereitos Humanos. A calidade do deseño de Bea está resultando difícil de superar.

Informe dos Dereitos Humanos en 2008 de Amnistía Internacional:

Tamén vos recomendo esta audiovisual de Amnistía Internacional sobre os 60 anos da Declaración.

Visitamos Culturgal

O pasado venres case en alumnos e alumnas do centro e cinco docentes visitamos a feira da cultura de Galicia: CULTURGAL.

Tras deleitarnos coa representación de Bicos con lingua, a obra de maior éxito do teatro galego, da compañía Talía teatro, recorrimos as instalacións de Palexco para apreciar a viveza e a riqueza da cultura galega: artes escénicas, vídeo creación, cinema, cinema de animación, teatro, publicacións periódicas, literatura, editoriais, creación musical (como toca o baixo o profesor de debuxo!!!)

O seu programa oficial, na prensa.

A frase do mes

Adolfo Bioy Casares

"Pocos objetos materiales han de estar tan entrañablemente vinculados a nuestra vida como algunos libros. Los queremos por sus enseñanzas, porque nos dieron placer, porque estimularon nuestra inteligencia, o nuestra imaginación, o nuestras ganas de vivir."

As mochilas viaxeiras iniciaron o seu recorrido

Tras varios meses de estar agochadas nalgún armario, as mochilas foron liberadas. Primeiro foron expostas a posibles clientes (para que son?, para quen son?, podo levarme algunha?), despois foron recibindo materiais (música, cine, revistas, libros) para que os nosos alumnos e alumnas e as súas familias podan descubrir a variedade de recursos documentais da nosa biblioteca ao tempo que disfrutan coa lectura, a música e o cinema.

Cada familia de 1º de ESO poderá ter as mochilas durante dúas semanas, asinando un pequeno contrato e cubrindo unha breve enquisa sobre os materiais, despois, as mochilas continuarán as súas enriquecedoras viaxes.

GRAZAS

Estes son algúns dos correos recibidos.

Get your own - Open publication

III Premio Nacional de buenas prácticas para la dinamización e innovación de las bibliotecas de los centros escolares

Acabamos de recibir a noticia de que a nosa biblioteca foi galardonada co III Premio no “concurso nacional de buenas prácticas para la dinamización e innovación de las bibliotecas de los centros escolares” do Ministerio de Educación.

O Equipo da Biblioteca O Bosque Animado está moi contento e satisfeito pola valoración que desde fóra do centro se fai do noso traballo.

Este premio queremos dedicalo especialmente ao alumnado do IES Afonso X O Sabio. Queremos, tamén, agradecer a todas as persoas que os durante cursos anteriores participaron na mellora da biblioteca (docentes, ANPA, compañeiros e compañeiras doutros centros...) a súa dedicación é esforzo.

Este premio é de tod@s e para tod@s

E moitas grazas aos máis de sesenta que centros/responsables de bibliotecas escolares que nos teñen felicitado (desde os outros centros de Cambre, a toda Galicia, a Murcia, Barcelona, Portugal, México...). Impresionados estamos.

25-N: Día Contra a Violencia de Xénero

Outro ano máis as Bibliotecas Escolares Galegas únense para berrar : ¡NON Á VIOLENCIA!, ¡NON Á VIOLENCIA SOBRE A MULLER!

Amistades peligrosas: "Quítame ese velo"

Shania Twain: "Black eyes, blue tears"

Amaral "Salir corriendo"

Ismael Serrano "Caperucita"

Estes blog comparten con nós o seu traballo: Trafegando ronseis (imprescindible visitar as súas entradas sobre a violencia) e O Segrel do Penedo (coñecede a entrada do venres día 21). Non esquezades visitar as entradas sobre este tema noutros dous magníficos blogs: Mesturas e Biblioarzúa.

1984, de George Orwell (novela de ciencia-ficción)

George Orwell, 1984, Salvat Editores

Hoxe en día, a maioría da xente cando lle falas de ciencia-ficción pensa en: extraterrestres, naves espaciais, etc. En realidade, a ciencia-ficción é moito máis que iso, e esta intimamente ligada coa ciencia e a filosofía; como por exemplo, se nos mostra en esta obra de George Orwell 1984.

Nesta obra, unha das máis importantes do xénero, presentasenos un mundo como o noso, pero no futuro, no cal as personas perderon a sua capacidade de pensamento, sentimentos, intimidade, e viven controladas, vixiadas e dominadas pola omnipresente figura do ``Gran Irmán´´(todo nace dos libros... ata os ``reality-shows´´).

Adiante, atrevete a acompañar a Winston Smith (o protagonista da obra) nunha loita contra o ``Gran Irmán´´, contra o poder establecido e sobre todo, unha loita consigo mesmo para cambiar a sociedade, para cambiar o mundo.

Atrevete a ler esta incrible obra mestra da ciencia-ficción e descobre ¿quen é en realidade o ``Gran Irmán´´?, ou se en realidade, ¿vivimos (hoxe en día) sometidos a unha ``especie´´ de ``Gran Irmán´´?

FRASES DO LIBRO

*AS TRES CONSIGNAS DO ``GRAN IRMÁN´´:

- ``A guerra é a paz´´
-``A liberdade é a esclavitude´´
-``A ignorancia é a forza´´

-``Quen controla o presente, controla o pasado, e quen controla o pasado, controla o futuro´´.


E agora, para que vos animedes ainda máis a ler o libro( que podedes encontrar na biblioteca do instituto) poño un par de videos de ``Youtube´´ sobre a obra:

1.Todo bo libro, ten unha película; aqui se mostra un anaco dela, coa música do gran grupo de ``rock alternative´´ RADIOHEAD, o cal lle dedica unha canción a este libro titulada: ``1+1=5´´, o significado dese título e o poque da canción, o saberedes o ler o libro(¿?) ...

2. Os dous videos seguientes tratan unha das ideas principais do libro, o control e vixilancia da xente por parte do``Gran Hermano´´, so que nestes videos aplicase a actualidade...





Espero que vos animedes a lelo.

Iván Carnota (2º B bach.)

JMG Le Clézio premio Nobel de Literatura

“Non hai arqueoloxía sen escrita; pois de non existiren aqueles signos case borrados que rodean as tumbas e as ruínas, os monumentos máis bonitos da humanidade non se diferenciarían moito de montóns de pedrolos”. (Voyage à Rodrigues, Gallimard, 1986). Quen escribe esa bela apoloxía da escrita, e confesa escribir desde os sete anos resulta ser tamén un autor atento ás transmisións orais, como o demostra o fermoso Gens des nuages (Stock).

A concesión do Nobel de literatura ao francés JMG Le Clézio (Nice, 1940) pillou ao mundo editorial galego (e castelán tamén) algo desprevido. Tan só unha obra traducida para galego; pero que xa estaba na nosa biblioteca: Mondo e outras historias (Col. Xabarín, Xerais, 1987) é das poucas obras do autor que poden levar a etiqueta de literatura infantil e xuvenil (LIX), e debemos recoñecer que na Galiza de mediados dos anos 80 non sobraban títulos de literatura mundial traducida nen títulos de LIX en xeral. Pero como se fose un desmentido á etiqueta redutora, outra parte da obra de Le Clézio tamén é moi recomendábel para un público novo.

Que a nova do Nobel sexa iso, un pretexto para achegarse á obra dun viaxeiro singular que escoita antes de falar, que observa e non xulga, que se nutre da oralidade dos pobos máis esquecidos polo triúnfo dos Tempos Modernos, desde as lendas dos Maias até os contos dos Tuaregs do deserto, sen exotismo, sen tópicos ilusorios nin xestos coloniais… Amig@ lector@, atoparás un eco das túas ansias viaxeiras e/ou libertadoras na lectura de Mondo…? E se non podes esperar, recomendamos a lectura en francés de Désert , Onitsha ou Ourania (todas en Gallimard).

Máis información en O levantador de minas.

Foto da entrada vía: O levantador de minas.

Novas recomendacións de cine

Dentro das novas adquisicións da biblioteca, recomendámosvos estas cinco películas.

"14 quilómetros" é a distancia que separa o continente africano de Europa polo Estreito de Xibraltar. En África hai millóns de persoas cuxo único obxectivo é entrar en Europa porque o fame non entende de fronteiras nin de barreiras. Esta longametraxe quere achegar un pouco de luz ás sombras e que vexamos o que pasa antes de iniciar o salto.

"Juntos, nada más". Camille limpa oficinas polas noites e debuxa con arte nas súas horas libres. Philibert é un mozo aristócrata amante da historia, tímido, sensible e solitario que vive nun espazoso piso, propiedade da familia. Franck un cociñeiro tenro e varonil, quere inmensamente á súa avoa Paulette, unha fráxil anciá moi sui generis. Xuntos, aprenden a vivir en compañía, a mitigar dúbidas e penas para que cada un poida avanzar na vida e materializar os seus soños. Cobran conciencia de que a unión fai a forza.

"Cometas en el cielo". Adaptación ao cine da novela do afgán-americano Khaled Hosseini, que en 2005 foi un dos libros máis vendidos do ano en USA. A historia céntrase en como Amir (Khalid Abdalla) -o cal deixou Afganistan moitos anos atrás-, volve para descubrir que o seu mellor amigo, Hassan, está morto, e que o seu fillo necesita axuda para escapar dos talibán.

"Juno" Macguff ten 16 anos e é enxeñosa, culta, rápida nas respostas, observadora e, sobre todo, sarcástica. Ese sarcasmo é a súa particular trincheira para esconder os seus medos e as dúbidas. A relación que mantén cun compañeiro de clase, Bleeker acaba de deixar froito: está embarazada. Juno está soa co seu problema pero xa tomou unha decisión: terá o neno e darao en adopción.

"Vete y vive". Miles de refuxiados africanos procedentes de vinte e seis países chegan aos campamentos de Sudán. A instancias de Estados Unidos e Israel púxose en marcha un vasto proxecto (Operación Moisés) para levar aos xudeus etíopes (falashas) a Israel. Unha nai cristiá convence ao seu fillo de nove anos para que diga que é xudeu e así salvarlle da fame negra e dunha morte segura.

Enciclopedia de malos alumnos y rebeldes que llegaron a genios

“Quen apostaría por eles cando eran mozos?Aquí tedes unha galería de retratos de homes e mulleres que marcaron a historia, a literatura, as artes ou as ciencias… a pesar dos seus caóticos primeiros pasos.

Nos colexios foron declarados mediocres, ineptos, condenados ao fracaso: malos alumnos! Na familia e no traballo desesperáronse, exasperáronse co seu carácter rebelde. Adurmiñáronse xunto ao radiador ou multiplicaron os desvíos antes de atopar o seu camiño ou de abrir a porta correcta.

Co tempo, a historia os encumbrou á gloria, convertíndoos en xenios. Esas figuras impresionantes dominan a nosa cultura escolar como estatuas. Os dicionarios e os museos preséntanolos co rostro austero e os petos cheos de cualidades. Pero os petos teñen buratos.

Redescubramos aquí a eses grandes nomes doutro xeito. A través da súa insolente mocidade.”

Do Prefacio de, Anne Blanchard.

Jean-Bernard Pouy, Serge Bloch, Anne Blanchard. Enciclopedia de malos alumnos y rebeldes que llegaron a genios. Bos Aires, Catapulta editores, 2008

A piques de publicarse a segunda parte de Millenium

Extracto da noticia de hoxe de El País:

Hoy la trilogía Millennium es un fenómeno editorial internacional. Su segunda entrega, La chica que soñaba con una cerilla y un bidón de gasolina (Destino), sale el próximo día 25 a la venta en España, donde ya se han vendido 300.000 ejemplares del primer libro, Los hombres que no amaban a las mujeres, cuya octava edición acaba de salir a la venta.

Con el nuevo libro se confirma algo que se intuía en el primer tomo y que para muchos es la gran baza de Millennium: la fuerza de su personaje femenino. "Ella es una mezcla entre Pippi Calzaslargas, una guerrillera africana y el Dalai Lama", dice Kurdo Baksi, uno de los mejores amigos de Larsson, al preguntarle por Lisbeth Salander. Baksi, que aparece como personaje en el tercer tomo de Millennium, La reina en el palacio de las corrientes de aire, conoció al escritor en los años noventa. En perfecto español ("soy un kurdo sueco que estudió español en la universidad", explica al otro lado del teléfono) recuerda cómo en 1992 Larsson se puso en contacto con él: "Ese año un tipo al que apodaron El Hombre Láser mató a varios inmigrantes en Suecia, yo capitaneé un movimiento de protesta que pretendía paralizar durante 24 horas a todos los inmigrantes, que ninguno fuera a trabajar para defender sus derechos. Larsson me llamó, quería ayudarme y participar en la huelga. Curiosamente él era un hombre mucho más de acción que de palabras".

Noticia completa e foto en El País.

Guinness world records 2009

O libro máis desexado.

O libro máis solicitado.

O libro máis demandado xa chegou á nosa biblioteca.

Todos os anos o libro máis buscado polo alumnado (estaremos facendo algo mal?) é o Guinness dos records.

En cada recreo hai carreiras para collelo.

Cada día pasa por unhas vinte mans.

É un documento de analizado, avaliado, interpretado. Volto a analizar, a avaliar e interpretar. Non hai que mandar nada sobre el.

É tan a seu atractivo que consegue que un número significativo de alumnos (maioritariamente rapaces) saiba os seus contidos case de memoria. Póñense un uso todos os resortes intelectuais para amosar as destrezas adquiridas no uso das competencias básicas.

Pura literatura.

Cuarto Aniversario de ANB

FELICIDADES ANB!!!

Hoxe ANB, (que ben lle queda ese nome, non si? Acaso non é A Nosa Biblioteca, a Biblioteca Virtual de todos e todas nós?) o noso blogue de referencia, o noso PROFE, MESTRE, MAGO, AMIGO... e moitísimo máis cumple catro anos na blogosfera.

Chegado este día non podemos deixalo pasar sen agradecerlle a ANTONIO ALONSO, e non só nós, senón TODAS AS BIBLIOTECAS ESCOLARES GALEGAS, a esas máns que nos levan pola Web 2.0 e máis aló, por ternos sacado ao exterior, porque grazas á súa xenerosidade sen límites, á súa paciencia e ao seu bo facer, hoxe, 9 de novembro de 2008, OS BLOGUES DAS BIBES GALEGAS son xa un referente.

FELICIDADES E QUE SEXAN MOITOS MÁIS!!!

Tamén en:
O Segrel do Penedo

A frase do mes

J. L. Borges

"Emerson dijo que una biblioteca es un gabinete mágico en el que hay muchos espíritus hechizados. Despiertan cuando los llamamos; mientras no abrimos un libro, ese libro, literalmente, geométricamente, es un volumen, una cosa entre las cosas. Cuando lo abrimos, cuando el libro da con su lector, ocurre el hecho estético". (Siete noches)

J. L. Borges

Jalou que?... Pásate ao Samaín

31 de outubro, noite do Samaín.

O pasado ano empezamos a celebralo, resultando un éxito, tanto polo número de participantes como pola calidade dos traballos presentados. Este curso, a participación seguiu sendo moi numerosa (unhas cincuenta cabazas) e moitas delas tamén dunha gran calidade.

Introducimos a celebración desta festa popular para que se sigan mantendo e transmitindo as nosas festas tradicionais, cunha folla informativa para cada alumno e alumna. Logo colocáronse carteis en todo o centro, incitando á participación do alumnado. Así, o luns 27 e o martes 28 trouxeron as cabazas ao instituto e o mércores, xoves e venres, estiveron exportas. O venres 31, entregáronse uns agasallos ao alumnado participante.

Texto da folla informativa repartida a todo o alumnado:“Hai máis de 3000 anos, os pobos que vivían na costa atlántica europea, comezaron a celebrar unha festa ao inicio do inverno, que eles consideraban o principio do ano. Eles crían que esa noite desaparecía a fronteira entre os vivos e os mortos e que estes volvían para visitar aos vivos. Esta celebración chamábase SAMAÍN, que significaba na súa lingua “xuntanza” (de vivos e mortos).

Para ter contentos a estes espíritos, deixábase comida ou doces ás portas das casas que logo os rapaces e as rapazas se encargaban de recoller, asustando a quen non os deixaba con disfraces de fantasmas, meigas, esqueletos… Tamén durante séculos, o 31 de outubro, os nenos e nenas traballaban cabazas, baleirándoas e dándolles forma de cara terrorífica, que logo iluminaban poñendo unha candea no seu interior.

Coa chegada do cristianismo tentouse modificar ou “santificar” a celebración, como os solsticios de verán (san Xoán) e inverno (Nadal) ou o propio SAMAÍN, que se converteu en Día de Todos os Santos (en inglés “all hallow´s even”, do que deriva hallowen)..."

A morte na pintura

Vía INICIARTE, presentámosvos, no Día dos Defuntos, un vídeo sobre a pintura e a morte. Que vos parece?

Taller da Unesco de Formación de Formadores en ALFIN

Durante os días 27, 28, 29 e 30 de outurbo a nosa biblioteca ten a oportunidade de participar, previa invitación, no Taller da UNESCO de Formación de Formadores en Alfabetización Informacional que se está a desenvolver en Granada e que rematará o xoves 0 en Sevilla. É o oitavo obradoiro da UNESCO dos once previstos.

Estamos participando xentes de Túnez, Marrocos, Alxelia, Cuba, Italia, Costa Rica, Colombia, Chile, Portugal, España e un galeguiño. que traballa no ámbito de ALFIN e Biblioteca Escolar con profesionais da talla de Glória Durban, José Antonio Gómez, Mª José Vitorino, Jordi Fernández, Elisabete Fiel, Aurora Cuevas, etc.

Na sesión inaugural participou algunha política (Directora Xeral do Libro de Andalucía) cun discurso sen autovangloriarse e con peso, Cristóbal Pasadas, alma máter do Taller e, sobre todo, Misako Ito, da división da Sociedade da Información da UNESCO. Ademais das sesións plenarias, as xornadas desenvólvense por sectores (bibliotecas públicas, universitarias, escolares e profesionais) Estas sesións presenciais son a continuidade dun obradoiro virtual que viñemos desenvolvendo nos últimos meses e que terán continuidade nos vindeiros.

Sobre os contidos, traballos e conclusións, Biblioafonso irá informando puntualmente.

A muller que matou a Harry Potter: SIMPATÍA PARA O VAMPIRO

Stephanie Meyer paseando en traxe de diario...

"De tres cosas estoy segura: Primera,
Edward es un vampiro. Segunda,
una parte de él se muere por beber mi sangre. Y
tercera, estoy perdidamente enamorada de él."
(Bella, en Crepúsculo)

Chega por fin a SAGA DE "CREPÚSCULO" á nosa biblioteca: amor apaixoado, aventuras, intriga, toques sobrenaturais, xénero gótico... ¡Bye, bye, Harry Potter!, ¡so long, variña máxica!, ¡farewell, vasoira voadora! Os meigos perden; vampiros e homes-lobo... ARRASAN.
A nova escritora estadounidense Stephanie Meyer (Arizona, 1973), inspirada por un sono, cun bebé no colo e tres nenos pequenos en total ao seu cargo (¿non recorda isto á Rowling do comezo?), escribe á velocidade do raio a súa novela Crepúsculo (2005), que inmediatamente salta ao número un nas listas en EE UU, lugar do que non se baixa tampouco coas que seguen. Luna nueva (2006), Eclipse (2007) e Amanecer (Outubro do 2008), desprazando ao pobre Potter á segunda división (R.I.P.).

Bella é unha moza que chega a un lugar do Estado de Washington (Oeste dos EE UU'), o peor sitio do mundo, ou iso parece... Ata que coñece a Edward Cullen, misterioso, seductor e... vampiro. Xorde o amor apaixoado..., pero ao tempo el desexa beber ,,, o sangue de Bella... A cousa complicarase na segunda entrega, Luna nueva, cando o amigo de Bella, Jacob Black, non se conforma só coa mera amizade, e, por se fora pouco, resulta ser... licántropo (traducción simultánea: home-lobo), e é que Stephanie Meyer non perde o tempo. Da tropa de vampiros neófitos da terceira
parte, mellor falamos noutra ocasión, porque da un pouco de medo e a tinta non da hoxe para tanto.

Fans: Blogs de fans da serie aparecen por todas partes na rede, incluído o Sitio Oficial da autora mesma, como non; bandas de rock interpretan temas da saga, fans comprometidos con ambicións literarias escriben relatos cos personaxes da serie de Meyer e logo colgan eses relatos en Internet; os disfraces non faltan tampouco; se a autora comprométese a ir a determinada librería, fans de mil sitios
aparecen no evento; e así...

A saga en cifras: Premios por doquier; das tres primeiras entregas, máis de cinco millóns de copias soamente nos Estados Unidos; cento corenta e tres semanas nas listas do New York Times; centos de miles de fans...

O futuro da saga: Stephanie Meyer, talvez por gusto, talvez por amor aos seus fans, está agora mesmo finalizando o quinto libro, Midnight Sun, que xa vai chegando con polémica: doce capítulos foron ilegalmente "filtrados" e colgados en Internet. Meyer estivo á altura das circunstancias e tomou a decisión de non retiralos de aí , por respecto aos fans da serie, dixo. ¿Acabará aí a aventura de Bella e os demais? ¿Non? ¿Si? ¿Talvez? A biblioteca deste IES permanecerá atenta e vixilante á espera de acontecementos: non perdas a pista deste blog...

Pero, ¿hai peli ou non hai peli?: ¡Pois claro!, como non. Parece ser que neste próximo mes de Decembro teremos todos o gusto de comer turrón coa versión cinematográfica desta saga, ou polo menos da primeira parte, ¿ou non é que Harry Potter tivo unha larga cadea delas?

Non deixes de incluír os teus comentarios sobre as obras de Stephanie Meyer aquí, se tes a bondade. Recorda que o blog é de todos e a vida dun blog depende en gran medida dos comentarios e diálogos -e polémicas- que xera...

Boa caza.

Agustín Fernández Paz: Premio Nacional de Literatura Infantil e Xuvenil

Nova de hoxe en La Voz de Galicia:

«A miña obsesión é loitar pola dignificación da literatura xuvenil»
O autor lucense radicado en Vigo é o novo gañador do Premio Nacional ?de Literatura Infantil y Juvenil pola obra «O único que queda é o amor»

Agustín Fernández Paz (Vilalba, Lugo, 1947), espertou onte como nunha novela na que ao protagonista lle concedían o Premio Nacional de Literatura Infantil y Juvenil 2008. Pero non era un soño. O autor acadou o galardón que outorga o Ministerio de Cultura pola súa obra O único que queda é o amor , editada por Xerais en galego e por Anaya en castelán. O premio, dotado economicamente con 20.000 euros, distingue ao mellor libro de literatura infantil ou xuvenil publicado no 2007 en calquera das linguas oficiais que se falan en España. Fernández Paz, un dos grandes referentes da literatura infantil e xuvenil en galego, que reside en Vigo, onde se retirou o curso pasado como profesor de ensino secundario no Instituto Os Rosais II, no daba feito con tanta chamada.

-Pois como debe ser gañar o Nobel, ¿non?
-Bueno, iso non me preocupa ¡porque nesas creo que xa non me vou ver!
-¿Que valor lle outorga a este recoñecemento?
-Hoxe non é o momento no que estou máis consciente da cuestión, pero o valor é obvio. Durante os últimos anos tiña case sistematicamente un libro meu nos finalistas do premio nacional e non me sorrira a fortuna nunca. Acadalo para min é unha satisfacción grande polo significado que ten o premio, polo xurado, e porque é un recoñecemento que me facía ilusión.
-O seu libro premiado está escrito en galego. ¿Pódese ler xa no resto do país?
-Si. Toda a miña produción literaria está escrita en galego e traducida a outras linguas. No caso de O único que queda é o amor , xa está en castelán, portugués e sairá en catalán no Nadal.
-Aínda que é una novela xuvenil, ¿pode interesar a un adulto?
-É un libro dos que eu chamo de fronteira. Así pódenme ler rapaces de 15 anos e adultos sen prexuízos. Se fora ao revés, non sería posible. Non me agradan as convencións que hai socialmente sobre o termo literatura xuvenil, que se asocia con obras lixeiras de sexo, drogas e rock & roll. Na miña opinión, que defendo cos meus libros, a literatura xuvenil é aquela que poden ler os mozos independentemente de que tamén o poidan facer os adultos. O exemplo máis claro pode ser O neno co pixama a raias , que é claramente un libro xuvenil no sentido de que non ten complexidades formais.
-¿Por que apostou sempre pola literatura xuvenil?
-Porque os mozos son os lectores aos que me interesa dirixirme, quizás pola miña profesión de docente. Desde os anos 70 vinme na obriga de ler moitos libros deste tipo para recomendalos logo aos alumnos, e encontreime coa sorpresa de que polo mundo adiante había escritores magníficos que traballaban para un público xuvenil. Eu non fago máis que seguir os pasos de xente como Roald Dahl o Jostein Gaarder, que foron referencias para min. O escritor noruegués dicía nunha entrevista que el estaba empeñado en loitar por unha dignificación da literatura xuvenil. Apúntome a esas palabras.. É tamén a miña obsesión. O lectorado mozo é a semente do lectorado adulto e é importante escribir obras con calidade formal e interese .

Día da Biblioteca

Hoxe, 24 de outbro, celébrase o DÍA INTERNACIONAL DA BIBLIOTECA ESPOLAR.

Co gallo deste día a Asociación de Amigos de Libro Infantil e Xuvenil, vén de publicar, seguindo nos informa A Nosa Biblioteca, o fermoso cartel que podedes contemplar e un fermoso texto de Agustín fernández Paz. A ilustración é dun veciño de Cambre, Xosé Cobas.

Todos os alumnos e alumnas que hoxe se pasen pola súa biblio terán un agasallo. (ata rematar existencias)

Cambio climático: unha animación

Agora que hai algún que se atreve a falar dos "profetas apocalípticos do cambio climático" e que chega a dubidar da súa existencia e da responsabilidade humana no mesmo, mirade esta fermosa e impactante animación dixital.

Global Warming from ivan oviedo on Vimeo.

Vía: Artecg.

Stieg Larsson. Los hombres que no amaban a las mujeres. Millennium I.

Stieg Larsson. Los hombres que no amaban a las mujeres. Millennium I. Destino, 2008.

A novela revelación deste verán. Xa leva vendidos máis dun millón de exemplares en Europa. O seu autor, Stieg Larsson, morreu antes de ver publicada esta obra, primeira da triloxía Millennium.

Pura novela negra: corrupción económica, periodistas e investigadora privada, secuestro, desaparición, asasinato? Os conflitos de familia, perversións sexuais, trampas financeiras, violencia e as relacións persoais entre dous grandes personaxes literarios.

Agardamos con impaciencia a publicación das dúas novas obras do mesmo autor:

La chica que soñaba con una cerilla y un bidón de gasolina.

La reina en el palacio de las corrientes de aire.

II Encontros de Bibliotecas Escolares de Galicia

Os pasados 17 e 18 de outubro, a nosa biblioteca tivo a oportunidade de compartir, xunto con case mil docentes de toda Galicia, os II ENCONTROS DE BIBLIOTECAS ESCOLARES en Santiago.

Foron dous días intensos de traballo pero moi proveitosos xa que coñecemos á admirada, desde hai máis dunha ducia de anos, Isabel Solé; con Pepe García Guerrero reforzámonos no concepto de Biblioteca Escolar e con Antonio Basanta seguimos comprobando a paixón que a lectura desperta nalgunhas persoas.

Ademais diso, nestes dous días coñecemos as experiencias de moitos centros educativos como do IES Lila de Tenerife, do IES Alexandre Bóveda de Vigo ou o San Francisco Xavier da Coruña. Tamén podemos amosar parte do traballo que se realiza no “Bosque Animado” a outros compañeiros e compañeiras.

Igualmente tivemos a posibilidade de dar a coñercer a AGABEL, a Asociación Galega polas Bibliotecas Escolares e a Lectura.

E para rematar eses dous días, rimos, rimos e rimos.

Máis información en Blogfesquio, O segrel do Penedo.

Máis fotos en: A nosa biblioteca.

Unha nova biblioteca na Coruña

O pasado viernes, 10 de outubro, foi inaugurada a ampliación da Biblioteca Municipal do Castrillón na Coruña. Coa próxima conclusión das obras na biblioteca de Os Rosales, a Rede municipal de Bibliotecas vólvese colocar na cabeza dos servicios aos cidadáns. Son mil metros cadrados máis, é a sexta das bibliotecas municipais, que permitirán continuar mantenéndose á cabeza do Estado por número de socios e socias, por número de documentos y por número de préstamos en relación aos habitantes (860.000 visitantes, 66.108 socios, 333.115 préstamos, 27.792 participantes en actividades, 87.678 usos de ordenador no ano 2007) . Felicidades.

Máis información en La Opinión, El Ideal Gallego e no Concello da Coruña.

Roteiro polas Bibliotecas Escolares (VII): Escola Unitaria de Vide

Hoxe comezamos os nosos Roteiros polas Bibliotecas Escolares Galegas na Escola Unitaria de Vide. E aínda que Toño, un dos membros fundamentais do GBI, non puido vir (disque está nas Canarias por motivos laborais!!) a compañía non puido ser mellor. Nesta ocasión pasamos de tres a cinco e connosco estiveron Beni, Carmela e Gina.

Sobre a unha e media do mediodía, nun marabilloso día de sol, chegamos a "As Neves" (O Sol do Condado) onde nos recibiron Sabela e Lourdes.

Mentras facíamos tempo para comer e despois de admirar unhas magníficas vistas, Sabela dounos unha lección maxistral sobre a arte da pesca da lamprea, de como se seca, das distintas maneiras de preparala, disque se pode guisar, rebozar, ponse tamén á prancha e por suposto rechea. Máis chegado ese momento decidimos ir xantar. Que fame tiñamos!!!

E chegou a ansiada lamprea acompañada dun magnífico Alvariño. Preparáronna rechea, estaba exquisita. Gustounos tanto que xa estamos desexando que chegue a temporada para ir probar a lamprea verde, pero esa será outra historia...

Ás cinco, rematada a comida e logo dos cafés e dunha conversa moi agradable, xa se sabe bibliotecas escolares, clubs de lectura, encontros..., saímos para a ESCOLA, porque eso é o que é, unha ESCOLA con maiúsculas. Unha escola unitaria como as que xa non quedan. Unha escola onde o "currículo" tamén o marca unha rá que aparece unha mañá polo patio, a viña que está ao carón da escola ou calquera outra circunstancia que motive aos pequenos. Unha escola cunha biblioteca, a Biblioteca "A Dúas", que é o motor arredor do que xira non só a vida da escola, senón tamén a vida cultural do pobo. "A Dúas" é o punto de encontro onde os veciños se xuntan cada xoves para ver unha película ou para calquera outra actividade que a MESTRA, unha muller moi especial, organice.

Un dos "libros" máis importantes do fondo de "A Dúas"

VVAA: Érase unha vez... A Dúas, Editorial Unitariadevide, As Neves (2007)

E despois desta visita que tanto desexábamos facer, non chegou a despedida. Non, as nais de Vide "Compoñentes do Equipo da Biblioteca", nos tiñan preparada unha sorpresa moi especial. Na Casa da Auga agasalláronnos cunha magnífica actuación dunhas fantásticas pandeireteiras, e un pandeireteiro, que fixeron que a nosa visita a Vide sexa inesquecible.

Grazas a todas por facernos sentir como se fóramos uns máis do grupo.

Ata a próxima, que esto hai que repetilo!!!

Tamén nos outros GBI Blogues:
A Nosa Biblioteca
O Segrel do Penedo

Outra crónica en:
Cadernos de Vide

Os Roteiros do 07/08
CEIP Milladoiro-Malpica
CEIP José Cornide (A Coruña)
IES Uxío Novoneyra (A Coruña)
IES de Arzúa
IES Alexandre Bóveda (Vigo)
IES Río Cabe (Monforte)

II Encontros de Bibliotecas escolares de Galicia

Nos vindeiros días 17 e 18 de outubro a biblioteca "O bosque animado" estará presente nos II Encontros de Bibliotecas Escoalres de Galicia" compartindo e aprendendo doutras biblioteca escolares. Encargáronnos que falásemos da nosa experiencia á hora de producir materiais desde a biblioteca. Alí nos veremos.

Daniel Pennac en El País

Octavi Martí publica hoxe en El País unha longa entrevista con Daniel Pennac. Aquí tedes o último parágrafo:

Entre as satisfaccións inesperadas do autor Pennac está a acollida que mereceu Como unha novela (Xerais), un ensaio sobre a natureza da lectura, sobre o pracer que proporciona e como este non pode ser obrigatorio. "Cada curso atopábame con algún alumno que me preguntaba, o primeiro día de clase, se ía ser obrigatorio ler. Cando che preguntan iso estanche dicindo outra cousa: non se trata de que non lles guste ler, o que non lles gusta é que a continuación lles preguntes, que lles poñas en evidencia en clase, aparecer ante os ollos dos demais e os propios como un imbécil. ¡Todo iso non ten nada que ver coa lectura! ¡As preguntas non son a lectura! Desde fai décadas esa situación vén repetíndose e o Ministerio de Educación Nacional persiste nunha técnica que se revelou nefasta, polo menos para unha porcentaxe importante de alumnos. Eu líalles en clase fragmentos, afacíalles a descubrir a maxia do sentido. Ao final pedíanme os libros para poder acabalos, para saber como terminaba o que eu lles comezou". Pero se a idea xeral é boa para todos, a receita necesita de fórmulas de aplicacións personalizadas. Os rapaces non chegan á escola en igualdade de condicións. Por iso Pennac recorda o seu caso e o doutros moitos que lle fixeron ser feliz como profesor. Que aínda hoxe fan que vaia a miúdo aos institutos e colexios para falar cos alumnos. "O mellor é que moitos deles, que falan un francés cheo de tacos, repróchanme que nas miñas novelas tamén os haxa. ¡Para eles a literatura, a letra impresa, é sacra e non merece ser contaminada por vulgaridades!".

III ENCUENTRO Edublogs 2008, en Santiago de Compostela

Os pasados días 3, 4 e 5 de xullo BIBLIOAFONSO, tivo a posibilidade de participar no III Encuentro Edublog, actividade organizada por Aulablog, un dos referentes educativos da blogosfera. Este encontro estivo dedicado ás “Redes sociais e a educación” en el destacou a videoconferencia da profesora da Universidade Carlos III, Tíscar Lara, a charla de Jon Igelmo sobre emprego dos blogs como ferramenta educativa e a conferencia final final de Juan Freire sobre a cultura dixital.

Ademais podemos gozar de moitas experiencia realizadas por docentes. Lembrar, como non, a amosada por Loly Lago, webmáster do O Segrel do Penedo, quen nos falou da imprescindible relación entre as bibliotecas escolares e a web social. Tamén foi moi emocionante a experiencia do blog Chicass10 (tedes que coñecelo, por favor), así como o Proxecto Chirón dedicado á didáctica da cultura clásica.

Ademais tivemos tempo para aprender a traballar co Moodle, tempo para rir, para cantar.... En resume uns xornadas moi proveitosas. O vindeiro ano repetiremos a experiencia en Getxo. Ata o vindeiro ano!!!